Сир бүтэр уһугар кэлэммин
Хоту сир олохтоохторо тунаарар туундарабыт устунан ырыа аргыстаах төһөлөөх уһун айаны айаннаабыттара буолла. Ырыа, хомоҕой хоһооннортон тиһиллэн, музыканан доҕуһуолланан, күн сирин көрөр. Хас биирдии киһи туох эрэ уратылаах, айар талааннаах. Төһө да биллэр поэт буолбатахтарын иһин төрөөбүт-үөскээбит дойдуларын хоһуйан, иэйиигэ ылларбыт түгэннэрин хоһооҥҥо кубулутан көтүтэр айар куттаах дьон элбэх.
Күндү ааҕааччы, бүгүн Василий Константинович Шадрин сиэннэригэр анаабыт хоһоонноруттан: төрөөбүт-үөскээбит дойдутун – муустаах муора кытылыгар олохсуйбут Хара-Уулаах нэһилиэгин, ону тэҥэ Арктика тыйыс буолан баран, ураты кэрэ айылҕатын хоһуйбутун бэчээттиибит.
Арктикаҕа
Эн кэлээр саас манна
Күөх хаары көрөөрү,
Хоп-хойуу салгыны
Күөҥҥүнэн силэйэн хаамаары.
Эн кэлээр саас манна
Арктика биэрэгэр,
Тоҥ хаары тобулан
Ньургуһун үүнэрин көрөөрү.
Эн кэлээр саас манна
Сааскыны көрсөөрү,
Эрдэһит кыталык
Үҥкүүтүн көрөөрү.
Сааскы күн эргиччи сырдатыа,
Күөх хаарга күлүккүн түһэриэ,
Арктика халҕаһа муустарын
Сылаастык угуттуу сылытыа.
Айан көтөрдөрө
Киирбэт күннээх туундарам
Чуумпу сааскы түүнүгэр,
Кынаттарын ыһыктан,
Кыптыый курдук туттунан
Биэрэстэлээх үрдүктэн
Сааскы хойуу салгыны
Хайа солоон түстүлэр
Халыҥ үөрдээх уу куһа.
Сынньанаары, аһаары
Сымыыттаары, ууһаары
Сырдык күнү батыһан
Хоту көтөн кэллилэр.
Ыраах сиртэн айаннаан
Ыраас ууну көрөннөр,
Боруоҕалаах күөллэргэ
Бары түһэн кээстилэр.
Акыйаан
Сир бүтэр уһугар кэлэммин
“Оҕолоох” хайатын үрдүттэн
Бинокль тааһынан тартаран
Көрөбүн ыраахха муораҕа.
Бэрт ыраах акыйаан түгэҕэр
Мап-маҥан муустар усталлар,
Онтон ол бэтэрээ өттүгэр
Муора танкердара иһэллэр.
Хап-хара буруолаах танкердар
Илиҥҥи курууһу илдьэллэр,
Чуумпурбут хотугу акыйаан
Сибиниэс өҥүнэн килбэҥниир.
Хотугу даҕаны муораҕа
Көрүөххэ айыылаах син элбэх.
Маҥан киит үөрүнэн айанныыр,
Фонтанныы ыһыллар тыыннара.
Хомоҕо хоптолор көтөллөр,
Куоҕастар хуорунан ыллыыллар,
Түлүөннэр сырсыһа оонньууллар
Чуумпурбут киэҥ муора дуолугар.
Муораҕа
Ахтабын чуумпурбут муорабын,
Кытыыттан уомуллаах кытылбын.
Сиэркилэ ньуурунуу килбэйэр,
Сир-халлаан саҕахха ыпсыһар.
Оччоҕо көрүнэ кэлэллэр
Халлааҥҥа быдаммыт былыттар,
Кытылтан туруук таас хайалар
Мап-маҥан балыксыт хоптолор.
Тыала суох сайыҥҥы киэһэҕэ
Сылайбыт ийэлии нуурайар,
Биһиктээх оҕотун бигиирдии
Биэрэктэн оргууйдук тайанар.
Оччоҕо кумаартан куотаннар,
Табалар, тайахтар киирэннэр,
Ып-ыраас бу сөрүүн кытылга
Сынньанан, дуоһуйан бараллар.
Оҕолорго
Аан дойду норуотун сайдыыта
Космос куйаарын кэриэтэ
Уһуга,муҥура биллибэт
Күн көмүс утаҕын кэриэтэ.
Эн эдэр инники олоҕуҥ
Хас биирдии туруук таастарын,
Тулалыыр эйгэҕэр дьүөрэлээн
Сөптөөхтүк уураргын умнума.
Хараҥа былыттыы иһийбит
Дьалхааннаах балаһа долгуннар,
Дьэп-дьэҥкир бытыылка иһигэр
Үҥкүүлээн дьиэрэҥкэй тэбэллэр.
Чэпчэки олоххо таласпыт
Эн туҥуй сүрэххин бутуйан,
Биир күҥҥэ, биир чааска дьоллоору
Угуйа, ыҥыра сирдииллэр.
Хомуйан бэлэмнээтэ
Евдокия Баишева