Талааннара арыллан...
Кэлиҥҥи сылларга Тиксиигэ Дьокуускай куораттан артыыстар кэлэн ыллаан-туойан барыылара аҕыйаата. Онон дьиэҕэ олорон кэнсиэрдэри телевизорынан көрөн дуоһуйаҕын. Илэ көрбүт киһи диэн санаа киирэр. Ол баҕа санаам туолан, ыам ыйын 21 күнүгэр государственнай филармония эдэркээн артыыстарын Сергей Яровенко (фортепиано), Ольга Олешкевич (скрипка) уонна Светлана Тютрина (виолончель) концерыгар сырыттым. Музыка иэйиитигэр ылларан, айылҕаттан бэриллибит талааҥҥа сүгүрүйэн, аан дойдуга биллибит айымньылары истэн, дууһалыын сынньанным. Бу кэрэ түгэни бэлэхтээбиттэригэр улаханнык махтанным. Идэлэрин толору баһылаабыт артыыстары көрөр-истэр – дьол.
Культурнай-спортивнай комплекс саалатыгар толору мустубут дьон хас биирдии нүөмэр кэнниттэн ытыстарын дохсуннук таһыныылара – кинилэр эмиэ мин курдук иэйиигэ ылларбыттарын туоһута буоллаҕа.
Артыыстар биһиги улууспут оҕолоро – Сергей Яровенко уонна Ольга Олешкевич Тиксиитээҕи искусство оскуолатыгар үөрэммиттэрэ. Сергей фортепиано кылааһыгар, онтон Ольга хореография уонна скрипка. Светлана эмиэ Булуҥҥа төрөөбүт, кыра сааһыгар төрөппүттэрэ Дьокуускайга көһөн барбыттар. Тиксиигэ ийэтинэн эһэтэ тыыл бэтэрээнэ Федор Семенович Бетюнскай олорор. Кырдьаҕас бастакы эрээккэ олорон кэнсиэри сэргии көрбүтүн маннык кэпсиир:
– Тоойуом, музыка диэн олус үчүгэй буоллаҕа. Оҕолор барахсаттар билиҥҥи кэм ыччаттара буоллахтара. Сиэним Света улахан кыыһым Наташа оҕото. Кинини күүппүтүм ыраатта.
Дьэ маннык кэпсэтэ турдахпытына, Света виолончелын туппутунан тиийэн кэлэн “Эһээ күүт, мин билигин кэлиэм сөп дуо?” – диэбитигэр, эһэтэ мүчүк гынна.
Бу иннинэ, кэнсиэр бүппүтүн кэннэ, хаартыскаҕа уопсай түһүү диэн биллэрбиттэригэр, Света түргэн үлүгэрдик сценаттан түһэн “Эһээ кэл, билигин хаатыскаҕа түһүөхпүт сөп” диэбитинэн эһэтин сэрэнэн илиититтэн ылан, сцена диэки илтэ. Маны көрөн “Кэрэ эйгэтигэр сыстыбыт оҕолор бары да олус эйэҕэстэр, сайаҕастар” диэн санаабын өссө бигэргэттим.
Дьэ, ити курдук эдэркээн артыыстар ыраах хоту улуустан силистэнэн-мутуктанан, музыка кэрэ эйгэтигэр олохторун анаан, бу идэни толору баһылаан, Саха сирин государственнай филармониятыгар үлэлии-хамсыы сырыттахтара. Бу кэнсиэргэ кэлбит биир дойдулаахтара, үөрэппит учууталлара, бииргэ үөрэммит доҕотторо, Тиксиитээҕи искусство оскуолатыгар үөрэнэр оҕолор кинилэр маастарыстыбаларын илэ көрөн-истэн, киэн туттан, дуоһуйан тарҕастылар.
Кэнсиэр кэннэ дьиэбэр ыалым оҕотун кытта аргыстаһан бардыбыт. Онно ол оҕочоон: “Как они классно играют, особенно Ольга Олешкевич” – диир. Бу кыыс бэйэтэ Тиксиитээҕи искусство оскуолатын скрипка кылааһын бүтэрбитэ. Эдьиийэ хореография кылааһыгар үөрэммитэ.
Манна хайаан да бэлиэтиэхпин наада. Ол курдук, Булуҥ улууһун оҕолоро Тиксиитээҕи искусство оскуолатыгар үөрэнэн талааннара арыллыбыта диэтэхпинэ сыыспатым буолуо.
Иинникитин да биһиги улууспутугар “Музыка барыбытыгар” бырайыак олохтоохтор сэҥээриилэрин ылан, олоххо киирэн, үүнэр кэнчээри ыччаттарбыт кэрэ эйгэни кытта эҥэрдэһэн олоххо үтүө-сырдык санаалаах дьон буолалларыгар баҕарабын.
Евдокия БАИШЕВА