Урбаанньыттар көрсүһүүлэрэ
Сэтинньи 25 күнүгэр Культурно-
спортивнай комплекс дьиэтигэр
эдэр урбаанньыттар көрсүһүүлэрэ
буолан ааста.
Көрсүһүүнү иилээн-саҕалаан
ыытта эдэр эрчимнээх урбаанньыт
– Протопопов Сергей Иванович.
Кини билигин Дьокуускай
куоракка ААУ «Система-элемент»
директорынан үлэлии сылдьар.
Кылаабынай офиһа
Сахабыт сирин киин куоратыгар
баар. Бу тэрилтэ үлэһиттэрэ
Москва, Гон-Конг курдук улахан
куораттарынан сылдьан,
киэҥ эйгэнэн үлэлииллэр.
Уопсайа кэпсэтиигэ Тиксииттэн уон биэс, сүүрбэччэ урбаанньыт кыттыыны ылла. Сергей мунньустубут дьону тугунан дьарыктаналларын ыйытта, сүрүннээн кэпсэтии хайдах киэҥ эйгэҕэ тахсар туһунан буолла. «Киһи олоҕор сыаллаах буолуохтаах. Билигин мээнэ бэлэмҥэ олорбокко, дьыбаан киэргэлэ буолбакка, киирэн-тахсан, олоҕуҥ инники өттүгэр туохтан да куттаммакка, кэпсэтэн-ипсэтэн, инники олохпутугар үчүгэйдик олорорбут туһугар үлэлэһиэххэ наада. Былыр эдэр дьон библиотекаҕа улахан эрэйинэн тиийэр буоллахтарына, билиҥҥи үйэҕэ урукку олоххо тэҥнээтэххэ, туохпут барыта баар. Интернет нөҥүө тугу баҕарар булуохха сөп, бэйэбит баҕалаах эрэ буолуохпутун наада», – диир Сергей Иванович.
“Эдэр урбаанньыт ыйга орто хамнас төһө буолуой?”, – диэн ыйытыкка, маннык диэн хоруйдаата: «Ыраах Хоту сиригэр орто хамнас алта уон, сэттэ уон тыһыынча харчы курдук буолуохтаах, ким төһө элбэх иитимньилээҕинэн. Киһи бэйэтигэр сыал-сорук туруоруохтаах уонна онтукатын толоруохтаах, толоро сатыахтаах».
Бэлиэтээн эттэххэ, маннааҕы урбанньыттар, манна орто хамнас ыйга 150-170 тыһыынча буолуохтаах диэн түмүккэ кэллилэр.
Харысхан Попов,
Ааптар хаартыскалара