Түмэти нэһилиэгин кэскиллэрэ

Бүгүн Түмэти нэһилиэгэр 793  киһи олорор. Бу сылга, сэтинньи ый туругунан, 12 оҕо күн сирин көрбүт, тэҥнээн көрдөххө сыл анараа өттүгэр 9 оҕо этэ. Быйыл орто оскуоланы 19 оҕо бүтэрбититтэн, 17 оҕото үрдүк уонна орто анал үөрэхтэргэ киирбиттэр.  Үс саҥа эдэр учуутал оскуолаҕа үлэлии кэлбиттэр. Үөрдэрэ диэн иккитэ – Таймылыыр орто оскуолатын выпускниктарынан буолаллар –Лазарева Лиана Борисовна, нуучча тылын учуутала уонна Яковлева Екатерина Ивановна, история учуутала.

Нэһилиэк сайдар боп­пуруоһа – тутуу  (дьон олорор дьиэтэ, социальной суолталаах дьиэ-уот)  буолар.  Тү­мэти ыраах кырыы сытар, суола-ииһэ мөл­­төх нэһилиэгинэн биллэр. Ол гынан баран, нэһилиэк баһылыга Афа­насий Афанасьевич күүтэн олорбокко, төһө кыалларынан тутуу боп­­пуруоһунан үлэни саҕалаатыбыт диир.

Ол курдук, нэһилиэк тутууга сайдар генеральнай былаана бигэргэтиллибит, онно киирбиттэр анал бюджетынан тутуллуохтаах объектар: оҕо саа­да, балыыһа (ФАП), котельнай. Со­рох объектарга  бы­райыактыыр доку­ментация оҥоһуута саҕаламмыт. Онтон тутуулар саҕа­ланар сроктара, сылтан сыл аайы көһөн истэллэр да, Арктика улуус­тарыгар болҕомто күүһүрэн иһэринэн сибээстээн эрэл баар.

Нэһилиэк олохтоохторун көмөтүнэн гараж тутуллубут, 2012 сылтан мини-пилорама үлэлии турар.

ИЖС – чааһыный дьиэни тутуу программатыгар киирсэн, икки ыал дьиэ тутта сылдьар. Ол курдук, Винокуров Валерий Николаевич уонна  эдэр  ыал Владимир, Тамара Павловтар. Эдэр ыал хаһаайката Тамара кэпсиир: «Ыал буолан баран дьон  дьиэтин уларсан олорбуппут, быйыл  эргэ да буоллар, биир хостоох аварийнай туруктаах оһохтоох дьиэҕэ олоробут. Баһылык Афанасий Афанасьевич сүбэтинэн,  быйыл сайын дьоммут көмөлөһөн, дьиэ көндөйүн бүтэрдилэр. Тиийбэт ис матырыйаалбыт массыына суо­ла турдаҕына кэлиэхтээх. Ик­кис оҕобутугар бэриллибит ийэ капи­талынан туһанабыт. Этэҥҥэ 2015 сылга саҥа дьиэҕэ киириэхпит диэн бигэ эрэллээхпит. Дьиэбит турар учаастага табыгастаах, ыраас, кө­нө”, –  диэн үөрэ-көтө кэпсээтэ.

Афанасий Афанасьевич эдэр ыччакка анаан арочнай тииптээх спортивнай зал тутуутун былаан­ныыл­ларын өссө сайын кэпсээбитэ, тутарга табыгастаах тимир кон­струкциялар баал­ларын туһа­нан,  билигин туох табыллары­нан  былаан олоххо киирдэр диэн эрэнэр. Арыл­лаары ту­рар кыһыҥҥы суолунан куо­рат­тан  дьиэ тутуутугар анал­лаах матырыйаалы мас­сыы­налары­нан аҕал­тарар былааннаах­тар.

Кэтэһэн олорбокко, туох  кыал­­ларынан дьон туһугар  диэн оҥо­һуллар дьыа­ла, төһө да үгүс ыарахаттардааҕын  иһин, са­ҕалаабыт соруктара туо­луо диэн, мин  тус бэйэм баһылы­гы кытта кэпсэтэн баран, саар­бахтаабаппын. 

Татьяна Слепцова,

общ.корр.