Спортка бэриниилээх дьон

Физкультура учууталлара Голиков Иван Иванович, Корякин Константин Петрович үтүө түмүктэрдээх  оҕону  эт-хаан өттүнэн чэб­дигирдиигэ бэриниилээх үлэһиттэр.

Иккиэн Булун улууһун төрүт олох­тоохторо. Иван Иванович Хара-Уулаах­ха төрөөбүт, оскуола кэнниттэн  1992 сыллаах­ха Саха государственнай универ­ситеты бүтэрэн,  физкультура учууталынан  төрөөбүт нэһилиэгэр үлэтин-хамнаһын  саҕалаабыт.

Маҥнайгы  сыллартан үлэҕэ  угуйбут,  күүс-көмө  буолбут киһим диэн махтана ааттыыр  киьитинэн буолар Валерий Васильевич  Самойлов. Киниэхэ махтала муҥура суох. 2000 сыллаахтан идэтинэн Таймылыыр орто оскуолатыгар үлэлиир. Оҕо  эт-хаан  өттүнэн чэбдик буола улаатарыгар олук буолар физкультура уруоктарыгар суолтата улааппыттара, чаастара эбиллибиттэрэ  үтүө  түмүктэрдээҕин бэлиэтиир, сылын аайы улуустааҕы Хотугу оонньууларга ситиһиилэрэ тупсан иһэрэ, биирдиилээн да буоллар республикатааҕы күрэхтэһиилэргэ кытталлара. Үлэтигэр туох ыарахаттар көрсөллөрүн кыратык сырдатан ааста.

Ол курдук Уйбаан Уйбаанабыс ааттыыр кинилэртэн тутулуга суох  биричиинэни: суол-иис хаайтарыыта, үп-харчы тиийбэтэ- үгүс ыарахаттары үөскэтэр диир. Даҕатан аастахха ити буолар сүрүн киһи үлэтин түмүгүн атахтыыр төрүөтүнэн. Сиһилии кэпсээтэххэ – улуус таһымыгар ыытыллар күрэхтэргэ, нэһилиэкпит ыраах сытар буолан, айаммыт кыаллыбатыттан, сиринэн салгынынан транспорт систиэмэлээхтик сылдьыбатынан сибээстээн,  кыттыбаппыт. Онон сибээстээн чаҕылхай талааннар да, ситэ сайдыыта суох хаалаллара хо­молтолоох  диэн  этэр. Ол да буоллар, үтүө  дьыала  син-биир бэйэтин суолун то­булар. 

Уйбаан Голиков «туйаҕын хатарар» иитэн таһаарбыт уола билигин бэйэтин кытары бииргэ оскуолаҕа үлэлээн эрэр,  ол – Константин  Петрович Корякин буо­лар. Ону таһынан, үөрүүлээҕэ диэн ос­куола икки выпускнига: Анна Захарова уонна Сюзанна Винокурова Бүлүүтээҕи педагогическай колледжка физкультура салаатыгар үөрэнэ сылдьаллара буолар.

Уйбаан Уйбаанабыстан ыраах  хайы­һа­рынан улууска үгэскэ киирбит пере­ходтарга   төһө сылдьалларын   ыйыта­лаһабын. “Кэлэр саас Уус-Өлөөҥҥө анаан  хайыһарынан переход онорор былааҥҥа  баар. Ааспыт сылларга чугас сылдьарбыт, улахан  переходтарга   бара  иликпит”, – диэн билиннэ.

Константин Петрович анал үрдүк үөрэҕи бүтэрэн кэлэн, төрөөбүт Таймылыырыгар физкультура  учууталынан  2012  сылтан  үлэлээн  эрэр.

Бастаан  үлэбин саҕалыырбар кыра ыара­хаттар бааллара диир, онтон  билигин барыта үчүгэй. Оҕо спортка тардыһыыта улааппыта  үөрдэр диир,  Константин бэ­йэтэ спортка оҕо эрдэҕиттэн сыстан сити­һиитэ үгүс. Университетка  үөрэнэ  сылдьан, ыстаныыга спорт маастарын кандитатын нуорматын толорбут. Билигин оскуолаҕа сахалыы спорт көрүҥнэригэр сүрдээх талааннах уолаттар, кыргыттар  баалларын  бэлиэтээххэ  сөп  диир. Холо­бура, бэһис кылаас уола ыстаныыга ула­хан кылаас уолаттарын нуорматын толо­рор – икки миэтирэттэн итэҕэһэ суох ыстанар диэн кэпсиир. Дьарыктаатахха, кыһанан сыһыаннастахха инники өттүгэр улахан эрэллээх уол оҕо улаатыа диэн санаатын үллэстэр.

Константин Петрович сөбүлүүр идэтин талан, үлэтин толору баьылаабыта  харах­ха быраҕыллар. Эдэр дьон төрөөбүт сир­дэригэр төннөн кэлэн дойдуларын сайдыытын иннигэр үлэлииллэрэ-хам­сыылара үчүгэйэ сүрдээх диэн, мин бэ­лиэтии көрөбүн.  «Быйыл оскуоланы бүтэрээччилэртэн үс оҕобут физкуль­турнай институтка киириэн баҕалаахтар этэ да, бааллара кыра буолан, атын үөрэхтэргэ туттарыстылар”, – диэн Константин кэпсиир. Бу учуутал бэйэтин идэтигэр интириэһи үөскэтэн  идэтигэр угуйуутун үтүө холобура буолар. Оскуола спортка ситиһиилэрин толору көрдөрөр стендалар баар буолуохтарын туһунан баҕа санаабын  эттим. Спорт инвентарынан тыа сиригэр ыраах сытар нэһилиэк диэтэххэ, төһө кыалларанан  хааччыллаллар  эбит.

Быйылгыттан  оскуолаҕа  киирэр   ГТО  нуормалара оҕону сайыннарыыга, чэ­гиэн-чэбдик туруктаах оҕолору  олоххо  бэлэм­нээн  киллэриигэ  үтүө үлэлээх учуу­­таллар Иван Иванович Голиков, Кон­стантин Петрович бэйэлэрин сүдү кыһам­ньыларынан үлэҕэ ситиһиилэрэ үксүөҕэ эрэ диэн эрэл баар. 

Татьяна Слепцова,

общ.корр.

Ааптар хаартыскаҕа түһэриитэ