Ытык кырдьаҕастарга наада эдэр дьонтон истиҥ, амарах сыһыан
Кулун тутар 8 күнүгэр Аан дойдутааҕы дьахталлар күннэринэн сибээстээн бэтэрээннэр Сэбиэттэрин бэрэссэдээтэлэ М.А. Рожина уонна инбэлииттэр уопсастыбаларын салайааччыта Н.И. Апросимова салайыылаах улуус Ытык кырдьаҕастарын «Айхал» этнокультурнай кииҥҥэ муһан кинилэри чиэстээтилэр, бочуоттаатылар уонна бэтэрээннэр Сэбиэттэрин аатыттан бэтэрээннэргэ сэмэй бэлэхтэри туттардылар.
Төһө да бу күн буурҕалаах буоллар, буурҕаны буурҕа диэбэккэ, тыалы-кууһу ортотунан бэтэрээннэрбит кэлитэлээтилэр. Кинилэр истэригэр Старостина Мария Игнатьевна, Андросова Прасковья Николаевна, Самохвалова Ираида Павловна, Чурапчы оройуонуттан күүс өттүнэн көһөрүллэн кэлбит дьонтон биирдэрэ Попова Прасковья Ивановна курдук чиэстэнэр бэтэрээннэр бааллар. Биэчэри иилээн-саҕалаан Марфа Андреевна Филиппова-Булунская ыытта. Кырдьаҕастарбытыгар бу үөрүүлээх күҥҥэ улуус баһылыга Константин Николаевич Шахурдин эҕэрдэ тылын, баҕа санаатын тиэртэ уонна «Дорогие мои, ветераны» диэн ырыа бэлэх уунна. Улуус дьаһалтатын баһылыгын социальнай боппуруоска солбуйааччыта Роза Егоровна Мартынова икки ырыа ыллаан биэчэри киэргэттэ.
Ытык кырдьаҕастарбыт бу көрсүһүүгэ оонньоон, бириис сүүйэн, ырыа истэн, бэйэлэрэ ыллаан-туойан, үҥкүүлээн уонна уруккуларын санаан, оһуохайдаан, дуоһуйа сынньанан дьиэлэригэр тарҕастылар. Улууспутугар ытык кырдьаҕастарга маннык биэчэр ыыталлара олус үөрүүлээх, кинилэргэ наада эдэр дьонтон истиҥ, амарах сыһыан.
Харысхан ПОПОВ,
фото автора