КүҺүүргэ скандинавскай хаамыы
Билиӊӊи бириэмэҕэ скандинавскай хаамыы диэн олус дьикти спорт көрүӊэ киэӊник тэнийэн тарҕанан эрэр. Скандинавскай хаамыыны 30-с сыллартан финскэй хайыҺардьыттар саҕалаан барбыттар. Төрүттээччитэ Юхе Мието буолар.Онтон ыла өссө күүскэ тэнийэн биҺиэхэ эмиэ тиийдэ.
Ол курдук, биҺиги КүҺүүрбүтүгэр скандинавскай хаамыынан дьарыктанан саҕалаан эрэр дьоннор үгүстэр. Скандинавскай хаамыыны сүнньүнэн нэҺилиэк саастаах дьоно сөбүлээн дьарыктаналлар. Бу көрүӊ туҺунан иҺиттэххэ, аахтахха бэйэтэ туспа интэриэҺинэй, олус диэн туҺалаах чэбдигирии көрүӊэ. Скандинавскай хаамыы эти-хааны эрчийэр, сайыннарар.
Кини сүрэх тэбиитин күүҺүрдэр, хаан эргиирин түргэтэтэр, уӊуоҕу кытаатыннарар уонна илии, атах былчыӊнарын сайыннарар.
Бу хаамыынан дьарыктанан саҕалаабыт нэҺилиэнньэ олохтоохторун кытта сэҺэргэстим.
Стручкова Полина Константиновна, Күһүүр нэһилиэгин администрациятын сүрүннүүр специалиһа:
– Мин скандинавскай хаамыынан, кэргэмминээн Иннокентийдыын, бу сыл тохсунньу ыйыттан саҕалаан дьарыктаммытым. Сорох күӊӊэ оҕолорбут эмиэ бииргэ барсан хааман кэлэллэр. БиҺиги киэҺээ өттүгэр хаамабыт. Бастаан биир километрга тиийэ хаамар этибит, онтон арыый хаамар суолбутун уҺатан үс километрдаах «Кураанах» диэн чугас сытар учаастакка тиийэ хаамабыт. Бу көрүӊ туох туҺаны аҕалла диэӊӊэ, мин этиэм этэ, бастатан туран ыйааҺыммын бырахтым, атахтарым сүҺүөҕэ да ыалдьара аматыйда уонна кэнники бириэмэҕэ хаан баттааһыммар (давлениябар) эмп да испэт буоллум. Кэргэним куртаҕа ыалдьара тохтоото. Түүнүн олох кытаанахтык утуйабыт. Уопсайынан сүбэлиэм этэ – иллэӊ бириэмэ көҺүннэ да, скандинавскай хаамыынан күннэтэ дьарыктаныҥ. Кини туһата элбэх.
Никитина Прасковья Иннокентьевна, алын кылаас учуутала:
– Мин 2003 сыллаахтан көннөрү маһа суох хаамар этим. Онтон скандинавскай хаамыыны интэриэһиргээммин, бу сыл тохсунньутуттан, бииргэ үлэлиир Лариса Ефимовна Слепцовалыын дьарыгыран бардыбыт. Биэс килэмиэтирдээх сиргэ хаамабыт. Сорох кэмӊэ сарсыарданан, сороҕор киэҺээ өттүгэр хаамабыт. Өскөтүн сарсыарда хааман кэллэххинэ - күнү быҺа сэниэлээхтик сылдьаҕын, киэҺэ хаамар буоллаххына – түүн үчүгэйдик утуйаҕын. Мин ыйааҺыммыттан үс киилэ түһэрдим. Биир тылынан эттэххэ, скандинавскай хаамыы уопсай доруобуйа туругар туһалаах.
Старостина Галина Егоровна, пенсионер:
– Скандинавскай хаамыынан 2014 сыл алтынньы 14 күнүттэн дьарыктанан саҕалаабытым. Мин биэс килэмиэтири хааман эргийэн кэлэбин, уопсайа хаамыыбар икки чаас барыыбын. Хаамыам иннинэ бастаан илиибэр, атахпар араас хамнаныылары оҥороммун эппин-хааммын бэлэмниибин. СүҺүөхтэрим ыалдьаллара уонна атаҕым тарбахтара олох куҺаҕаннык үлэлииллэрэ. Бэйэм хайыҺарга маҥнайгы разрядтаахпын, онон ыарахаттары көрсүбэппин, холкутук хаамабын. Хааман бүтэн эбэҺээт тыын ылар, сынньана түҺэр ордук. Маннык хаамыы туҺата диэн элбэх: тымныйыы ыарыыларын түргэнник аҺардар уонна хаан баттааһыныттан эрэйдэнэр дьоӊӊо олус туҺалаах эбит. Кырдьаҕас киҺи хамсана сылдьара доруобуйатыгар эмиэ тутулуктаах.
Өссө хаамар дьон үгүстэр. Онон бу спорт интэриэһинэй көрүӊүнэн дьарыктанан саҕалаан эрэр дьоӊӊо баҕарыам этэ ситиҺиилэри, чэбдик доруобуйаны. Скандинавскай хаамыынан дьарыктанар дьон ахсааннара өссө да үксүү турдун.
Н.И. Лебедева,
общкорр., Күһүүр
Ааптар хаартыската