Ахтан санаан ааһыахха (П.И. Филиппов төрөөбүтэ 100 сылыгар)
Петр Иванович Филиппов (25.06.1915-12.02.1985) – Саха республикатын культуратын үтүөлээх үлэһитэ, ССРС телевидениетын уонна радиотын туйгуна, Ярославскай аатынан бириэмийэ лауреата, суруйааччы, журналист, прозаик, очеркист, документалист, публицист, литературнай кириитик, 1915 сыл бэс ыйын 25 күнүгэр Сунтаарга төрөөбүт. Сэттис кылаас кэнниттэн киирэн учуутал үөрэҕин бүтэрбит, онтон учууталлыы сырыттаҕына, эдэркээн уолу хаһыат үлэтигэр ылаллар, ити үлэтин публицист-журналист быһыытынан саҕалаабыт. Таланнаах журналист 1944-1946 сс. Москваҕа хаһыат үлэһиттэрин куурсун бүтэрэн кэлээтин кытта «Кыым» хаһыакка отдел сэбиэдиссэйинэн ылбыттар.
Аан бастакы айымньытын «Эдэр коммуниска» саҕалаабыт: «Биһиги Максиммыт» диэн кыракый очеркалартан турара, маны таһынан саха большевиктарын В. Синеглазова, Рая Цугель, Дора Жиркова о.д.а. тустарынан очеркалары суруйбут, М.К. Аммосов олоҕун, үлэтин үөрэппитэ.
Петр филиппов туһунан табаарыстара уонна суруйааччылар олус истиҥник, иһирэхтик ахталлар, кини үрдүк култууралааҕын, билиитэ киэҥин, сэмэйин, киһитигин, чэбэрин, холкутун ордук чорботон бэлиэтииллэр.
Петр Иванович документалист-суруйааччы быһыытынан, Саха сирин таһынан нуучча уонна омук ааҕааччыларыгар эмиэ биллэр. Бу олус уустук жанрга кини талааннаахтык үлэлээбитин туһунан Савва Тарасов ахтан турардаах: «Документалист-суруйааччы архивка сатаан үлэлиэхтээх, онно логика, хайа докумуону хайдах ирдээн буларга өйдүүр туспа дьоҕур наадалааҕа биллэр. Ону сатыыр да буолан, Петр Филиппов киһини интириэһиргэтэр очеркалары, биллиилээх революционердар, Саха сиригэр олорбут политссыылынайдар, гражданскай сэрии геройдарын, улуу суруйааччылар тустарынан суруйдаҕа”.
Петр Иаванович кэргэнинээн Александра Дмитриевналыын 41 сыл устата, биирдэ да этиспэккэ-иирсибэккэ, биэс оҕону төрөтөн, Ларионовтар диэн аймахтарын түөрт тулаайах хаалбыт оҕолорун уонна кэргэнин үс бииргэ төрөөбүттэрин иитэн, үөрэхтээн, киһи гыммыттар.
Александра Дмитриевна оҕолорун, дьиэтин-уотун көрөн сүүрбэччэ сыл үлэлээбэтэх, соҕотох Петр Иванович хамнаһыгар олорбуттар, ити үлүгэр дьиэ кэргэни, хоноһону-ыалдьыты аһатар, хоннорор диэн аһыныгас сүрэхтэн, үтүө санааттан, киэҥ көҕүстэн тахсар, ол быыһыгар Петр Иванович сэттэ сыл Дьокуускайынан, Москванан, Хабаровскайынан үөрэммит. Кэргэнэ наһаа уус, иистэнньэҥ, суохтан да баар гынар сатабыллаах туттуулаах, дьаһаллаах да буолан, уонна уостубат улахан тапталлара, бэйэ бэйэлэригэр сымнаҕас, харастабыллаах сыһыаннара да өйөөн, Петр Иванович элбэҕи айдаҕа, суруйдаҕа, оҥордоҕо.
Матырыйаалы таҥан бэлэмнээтэ
общкор. Вуталина Стручкова