Өбүгэлэрбит оонньууларын сөргүтэ
Өбүгэлэрбит айылҕаларын кытта алтыһан, өйдөрүн-санааларын сайыннараары, эттэрин-хааннарын чэбдигирдээри сыл хайа баҕарар кэмигэр сөп түбэһиннэрэн араас күрэхтэри тэрийэллэрэ.
Ол курдук Бороҕон нэһилиэгэр саха төрүт оонньууларын умнубакка эрэ эдэр ыччаты, кэлэр көлүөнэни өбүгэ оонньууларыгар угуйабыт. Аҕа дойдуну көмүскээчилэр күннэригэр “Өбүгэ оонньуулара” тоҕус көрүҥнээх спортивнай күрэх ыытылынна. Дьикти көрүҥнэринэн “Оҕустар харсыһыылара”, “Ойбонтон уулааһын”, “Көтөх ынаҕы туруоруу”, “Бөтүүктэһии”, “Үрүҥкэй тэбии”, “Хорон оту үрдүнэн ыстаныы” буолла. Ону таһынан наарта ыстаныы, үс төгүл үс, тутум эргиир, куобахтааһын, мас тардыһыыта ыытылынна. Бу оонньууларга оҕолор олус интириэһиргээн көхтөөхтүк кииристилэр.
Тыҥааһыннаах киирсии кэнниттэн кыайыылаахтары чиэстээтибит. Бары көрүҥҥэ кыайан 1 миэстэҕэ тигистэ 10 кылаас үөрэнээччитэ Бубнов Николай, 2 миэстэ – 11 кылаас үөрэнээччитэ Старостин Антон, 3 бочуоттаах миэстэҕэ тигистэ 9 кылаас үөрэнээччитэ Сергей Никитин. Уолаттар сыаналаах бирииһинэн уонна грамотаннан наҕараадаланан олус үөрэн, дуоһуйан тарҕастылар. Инники өттүгэр өссө да атын интириэһинэй оонньуу көрүҥнэрин киллэрэн оонньотор былааннаахпыт.
“Омолой” этнокультурнай киин,
Бороҕон нэһ.