Үлэтигэр бэриниилээх үтүө киһи
Бүгүн биһиги кэпсиир киһибит өр сылларга култуура эйгэтигэр, чуолаан библиотекарынан үлэлиир СӨ култууратын туйгуна, үлэ бэтэрээнэ Наталья Мухоплева буолар. Наталья Ивановна Мэҥэ-Хаҥалас Рассолодатыттан төрүттээх, Булуҥ улууһун биир чулуу киһитигэр кэргэн тахсан, ыраах хоту Булуҥ улууһугар сүктэн кэлэн, силис тардан, бу күн бүгүнүгэр диэри Тиксии курдук тыйыс айылҕалаах сири таптаан, дойдутун курдук санаан, үс оҕо истиҥ ийэтэ, үс сиэн эбэтэ буолан үлэлии-хамсыы сылдьар.
– Мин бэйэм төрөөбүт-үөскээбит дойдубунан Мэҥэ-Хаҥалас Рассолодата буолар. Биһиги бииргэ төрөөбүттэр алтыабыт. Кэргэним Булуҥ Быыкабыттан сылдьара, кинилиин биһиги Дьокуускай куоракка устудьуоннуу сылдьан билсэн, Тиксии бөһүөлэгэр 1979 сыллаахха көһөн кэлбиппит. Кини үөрэҕин бүтэрэн Тиксииитээҕи искусство оскуолатыгар художественнай салааҕа преподавателинэн ананан кэлэн үлэлээбитэ. Хомойуох иһин кэргэним, оҕолорум аҕалара, 2008 сыллаахха ыалдьан күн сириттэн күрэммитэ.
Мин маҥнай утаа кэлээт даҕаны художественнай оскуолаҕа муоста сууйааччыннан үлэҕэ киирбитим. Оччолорго биһиэхэ Морская уулуссаҕа коммунальнай, биир хостоох дьиэни биэрбиттэрэ, онно олорон үлэлээбиппит. Бастакы оҕобун төрөөн, оҕобун көрөн олорбутум. Уопсайа икки уол уонна биир кыыс оҕолордоохпут. 1984 сыллаахха улуустааҕы библиотекаҕа библиотекарынан үлэлии киирбитим, онтон ылата бу бүгүҥҥү күҥҥэ диэри үлэлии-хамныы сылдьабын.
Оҕолорум туһунан кэпсиир буоллахха улахан уолум Булуҥ улууһугар Вневедомственнай охранаҕа сотруднигынан үлэлиир, кыра уолум дьиэ кэргэнин кытта Дьокуускай куоракка бааллар, ИДьМ сокуоннай саастарын ситэ илик оҕолор дьыалаларын инспекторынан үлэлиир, кыыһым маннааҕы Арктикатааҕы гимназияҕа нуучча тылыгар уонна литератууратыгар оҕолору үөрэтэр. Икки кыыс, биир уол иһирэх эбэтэбин.
Харысхан ПОПОВ
Ааптар хаартыскаҕа түһэриитэ