Саҥа кинигэ сүрэхтэннэ
Бу күннэргэ Тиксиигэ “Хоту оҕолоро” фестиваль буолан ааста. Кыттааччылар бэйэлэрин дьоҕурдарын көрдөрө бары нэһилиэктэртэн үмүөрүһэн кэлбиттэр. Оҕолорго анаан араас тэрээһиннэр ыытылыннылар. Бэлиэтээн эттэххэ, “Хоту оҕолоро” фестиваль оҕолорго биир саамай күүтүүлээх, үөрүүлээх, сылга биирдэ тэриллэр күрэҕинэн биллэр. Онон бу күрэххэ нэһилиэктэр төһө да киинтэн ыраах буоллаллар, транспорт да боппуруоһа ыарахаттардаах буоллар, туохтан да чаҕыйбакка улуус оскуолатын дьоҕурдаах үөрэнээччилэрэ бары кыттыыны ылаллар.
Ол курдук, муус устар 22 күнүгэр фестиваль кыттыылаахтарыгар анаан оҕо библиотекатыгар Наталья Гукова “По нехоженым тропам заполярных широт” диэн саҥа тахсыбыт кинигэтин сүрэхтэниитэ буолла.
Наталья Васильевна эбии үөрэхтээһин киинигэр үлэлии сылдьыбыт кэмигэр ЦВР иитиллээччилэрин кытта сайын аайы хонуктаах походтарга кыраайы үөрэтэр соруктаах айанныылларын видеоролик оҥорон көрдөрбүтэ. Ол туһунан кинигэ таһаарбытын кэпсээтэ. Кинигэҕэ үүнээйи, кыыл, үөн-көйүүр арааһа, улууспут кэрэ сирдэрэ тиһиллэн киирбиттэр. Кинигэ ааптара кэпсиир кэмигэр кинигэлэрин оҕолорго түҥэтэн көрдөрдө. Наталья Гукова салайыытынан кыраайы үөрэтэр уһуйааҥҥа сылдьыбыт оҕолор өйдөрүгэр-санааларыгар походтан умнуллубат араас түгэннэри көрөөччүлэри кытта үллэһиннилэр. Уһуйаан арыллыаҕыттан биир саамай өр кэмҥэ походтарга сылдьыспыт, билигин улуус библиотекатыгар үлэлиир Кириллин Костя буолар. Кини ол кэмнэрин санаан үөрүүтүн биллэрдэ уонна походтарга сылдьыбыта киниэхэ инники олоҕор туһалаабытын кэпсээтэ.
Сэһэргэһии кэннэ викторина тэрийэн ыыттылар.
Оҕолор кинигэни сүрдээҕин диэн сэргээбиттэрин биллэрдилэр.
Харысхан ПОПОВ
Ааптар хаартыскаҕа түһэриитэ