“Хоту оҕолоро” фестиваль кыттыылаахтарын санаалара

 Бурцева Варя, Бороҕон   орто   оскуолатын 9 кылаас үөрэнээччитэ:

– Бу күрэҕи сылы быһа кэтэспиппит.   Саҕаланыан   биир  ый    кэриҥэ хаалбытын кэннэ дьаныардаахтык, сыралаахтык бэлэмнэммиппит. Бу күрэххэ хаһыс да сылбытын кыттабыт. Кэтэспит түгэммит үүммүтүнэн үөрэбит, долгуйабыт, түмүк күүтэбит. Биһигини өйүү манна баар табаарыстарбыт, убай­дарбыт, эдьиийдэрбит кэлэллэр, улуус кии­нит­тэн ыраах олорор буоламмыт ийэлэрбит, аҕа­ларбыт күн ахсын телефонунан билсэллэр, үҥ­күүлэрбитин, ырыаларбытын, хайдах кыттыбып­пытын “Ватсап” нөҥүө ыытаммыт билэ-көрө оло­роллор. Тэрээһини, биһиги санаабытыгар, наһаа үчүгэйдик тэрийбиттэр. Биһиги турукпут кыайар­дыы, үчүгэйдик кыттыы уонна Бороҕоммут чиэһин көмүскүүрдүү.

  Прибылых Витя, Таймылыыр   орто оскуолатын 9 кылаас үөрэнээччитэ:

– Бөлөхпүт 9-11 кылаас оҕолортон састааптанан турар. Олунньуттан бэлэмнэнэн саҕалаабыппыт. Бу тэрээһиҥҥэ үһүс кыттааһыным буолар, онон улахан долгуйуу суох. Турукпут, санаабыт бөҕөх, барыта үчүгэй. Биһигини манна төрөппүттэрбит уонна манна олохсуйбут чугас дьоммут өйүүллэр, тирэх буолаллар.

Марбыкина Лена, Таймылыыр  орто  оскуолатын 11 кылаас үөрэнээччитэ:

–   “Хоту    оҕолоро” фестивальга кыттарбытыгар  бүтүн кэнсиэр оҥорон иһэн “Хотугу сулус” күрэх курдук барыа диэбиттэригэр тох­тоо­буппут. Иннэ гынан уон кэриҥэ нүө­мэрдээх кэлбиппит. Кыайыахпыт диэн бигэ эрэллээхпит. Тэрээһин үчүгэй, манна нэһилиэктэртэн кэлбит оҕолорго анаан-минээн араас мероприятиелэры ыыттылар, онон эппиккэ диэри хара сарсыардаттан солото суох сырыттыбыт. Атын нэһилиэк оҕолорун кы­тары билсиһэбит, кэпсэтэбит. Саҥаттан саҥа оҕолор маннык тэрээһиннэргэ бэйэлэрин талаан­нарын көрдөрөллөр.

  Ачикасова Настя, Таймылыыр   орто  оскуолатын 6 кылаас үөрэнээччитэ:

–   Мин  бу  күрэххэ 5 кылаастан кыттабын. Маннык “Хотугу сулус” курдук оҥорбуттара үчүгэй дии саныыбын. Миигин кытта бииргэ тө­рөөбүт быраатым кэлсиэхтээх этэ, кини ыалдьан кэлбэтэ. Сыанаҕа тахсарбар кыра долгуйуу баара, ол эрээри кыра эрдэхпиттэн бэйэм нэһилиэкпэр кэнсиэрдэргэ кытта үөрэммит буоламмын түргэнник долгу­йуубун аһарыныам дии саныыбын.

Кобякова Вера, Хара-Уулаах  орто оскуолатын 8 кылаас үөрэнээччитэ:

  –   Бу  күрэххэ кыттарбытыгар кыһыҥҥыттан бэлэмнэнэн саҕалаабыппыт. Бэлэмнэнэн дэлби сылайар этибит. Манна иккис сылбын кытта кэллим.  Би­лиҥҥи турукпут бойобуой, барыларын кыа­йыахпыт биһиги. Төрөппүттэрим наһаа өйүүллэр, күн ахсын субуоннаан билсэллэр, барыта сатаныа диэн этэллэр, уоскуталлар.

Харысхан ПОПОВ

Ааптар хаартыскалара