Кыайыы бырааһынньыга бэтэрээн эбээлэри муста
Ыам ыйын 6 күнүгэр улуустааҕы киин библиотека ааҕар саалатыгар сэрии кэминээҕи оҕолоро муһуннулар. Бырааһынньыгы бэтэрээн дьоммутугар инбэлииттэр уопсастыбаларын бэрэссэдээтэлэ Надежда Апросимова уонна ааҕар саала үлэһиттэрэ тэрийдилэр. Ол курдук тэрээһини иилээн-саҕалаан Вуталина Стручкова ыытта.
Вуталина Васильевна эҕэрдэ тыл эппитин кэннэ кырдьаҕастарга бэйэ илиинэн оҥоһуллубут сибэкки дьөрбөтүн туттартаатылар. 2016 сыл дойдуга Киинэ сыла биллэриллибитинэн тэрээһини ыытааччы күөх экраҥҥа киинэ буолан тахсыбыт кинигэлэр долбуурдарын көрдөрдө, кэпсээтэ. Мустубут эбээлэрбитигэр сэрии кэмнэрин көрдөрөр киинэлэргэ нууччалыы, сахалыы ылламмыт байыаннай ырыалар тустарынан викторина уонна байыаннай ис хоһоонноох өс хоһооннору салҕаан биэрии куонкуруһа ыытылынна. Кырдьаҕастарбыт өс хоһооннору салҕаан, ырыалары таайан сэргэхсийэн тарҕастылар.
Харысхан ПОПОВ
Ааптар хаартыскаҕа түһэриитэ