Киэн туттар дьиэ-кэргэммит
Дьиэ-кэргэҥҥэ анаммыт күнүнэн сибээстээн Хара-Уулаахнэһилиэгин биир киэн туттар, холобур оҥостор Болтуновтар дьиэ-кэргэттэрин туһунан кылгастык билиһиннэриэхпитин баҕарабыт.
Матрена Гаврильевна Найбаттан төрүттээх, Егор Дмитриевич – Күһүүртэн. Быйыл сүрэхтэрин холбоон, ыал буолан таптаһан олорбуттара 45 сыла буолар.
1970 сыллаахха Егор Дмитриевич Найбаҕа Өлүөхүмэтээҕи экспедиция партиятынан командировкаҕа радиһынан үлэлии кэлбитэ. Ол кэлэн сүрэҕин аҥарын Матренаны көрсөн 1971 сыллааха ыал буолбуттара. Түөрт оҕо иһирэх ийэтэ, амарах аҕата, аҕыс сиэн, биир хос сиэн тапталлаах эһээлэрэ, эйэҕэс эбээлэрэ.
Матрена Гаврильевна Булуҥ улууһун Киин библиотека систематын алтыс нүөмэрдээх филиалыгар сэбиэдиссэйинэн 20 сылын үлэлии сылдьар. Бэйэтин үлэтин үчүгэйдик билэр, олохтоох дьон билиитин хаҥатыыга элбэх араас өрүттээх үлэни ыытар. Библиотекаҕа араас кинигэ выставкаларын, юбилейдаах суруйааччылары бэлиэтээһиннэри, стендалары, көрсүһүүлэри, библиотечнай уруоктары, викториналары, обзордары ыыталыыр, араас матырыйаалларынан, кинигэлэринэн хааччыйар. Аҕыйах ахсааннаах хотугу норуоттар үгэстэрин тарҕатыыга республиканскай хамсааһыннарга кыттар уонна эбээн омук фолькло-рун, прикладной искусствотын
тарҕатыыга, сөргүтүүгэ улахан кылаат киллэрэр. Иистэнэрин сөбүлүүр, унтуулары, бэргэһэлэри тигэр, таба түүтүттэн араас сувенирдары, паннолары оҥорор. Өрөспүүбүлүкэ таһымыгар ыытыллыбыт быыстапкалар хас да төгүллээх кыттыылааҕа. Ону таһынан киниэхэ үтүө дьарыгынан буолар былыргы харчыны, значоктары хомуйуу. Инникитин нэһилиэк музейын тэрийэр сыаллаах соруктаах.
Егор Дмитриевич 35 сыл устата сибээс отделениетыгар электротехнигынан үлэлээн нэһилиэккэ сибээс сайдыытыгар улахан кылаат киллэрбит киһинэн буолар. РФ Сибээһин бэтэрээнэ, Булуҥ улууһун Бочуоттаах гражданина, үлэ бэтэрээнэ. Сөбүлүүр дьарыгынан булт буолар.
2008 сыллаахха дойду үрдүнэн биллэриллибит Дьиэ кэргэн сылын чэрчитинэн «Материнскай подвиг» эстафетатыгар кыттыыны ылбыттара. Дьиэ кэргэн олоҕор үтүө үгэһи тарҕатыыга Саха Өрөспүүбүлүкэтин Президенигэр дьиэ-кэргэн уонна оҕо аймах дьыалаларыгар комитет сертификатынан наҕараадаламмыттара.
Хара-Уулаах нэһэлиэгин дьахталларын түмсүүтэ