Саха театрын артыыстарын кытары биир дойдулаахпыт Ильяна Павлова кэлэр
Нэдиэлэ бүтүүтэ Булуҥ улууһугар П.А. Ойуунускай аатынан Саха академическэй театрын артыыстара Саха сирин култууратын туйгуна Макаров Петр Тимофеевич салайааччылаах кэлэллэрэ былааннанар.
Артыыстар ортолоругар Российскай Федерация үтүөлээх, Саха сирин норуодунай артыыһа Изабелла Николаева, Саха сирин култууратын туйгуннара Геннадий Турантаев уонна Ильяна Павлова бааллар. Кэргэннии Вячеслав, Айталина Лаверновтар, Семен Алексеев,Прокопий Данилов, Альберт Алексеев,Александр Борисов, Айсен Лугинов уонна Алдан Готовцев курдук саҥа тахсан эрэр эдэр эрчимнээх артыыстар кэлэллэрэ биллэр.
А.И. Софронов – Алампа “Олох дьэбэрэтэ”, А.П. Чехов “Юбилей”, Н.А. Лугинов “Предложение” испиктээкиллэри Булуҥ дьонугар-сэргэтигэр көрдөрүөхтэрэ. Онтон оҕолорго анаан Н. Лугинов “Кустук” испиктээкили оонньуохтара.
Олунньу 25-26 күннэригэр – Быыкапка, 27-28 – Хара-Уулаахха, кулун тутар 1-3 күннэригэр – Күһүүргэ, 4-5 – Тиксиигэ, 6-8 чыыһылаларга Таймылыырга уонна кулун тутар 9 күнүгэр Тиксиигэ гастроллууллар.
“Хас сыл аайы улуустарынан кэрийэ сылдьан испиктээкиллэри көрдөрүү – Саха театрын артыыстарын үгэстэрэ. Ааттаах-суоллаах, билиҥҥи дьон биһирэбилигэр сылдьар киинэ артыыстара биһиги улууспутугар маҥнайгы кэлиилэрэ буолар. Ол курдук, артыыстар кэккэлэригэр бэйэбит биир дойдулаахпыт, Булуҥ Таймылыырыттан төрүттээх Ильяна Павлова кэлсиэ”, – диэн улуустааҕы култуура управлениетын салайааччытын эбээһинэһин толорооччу Ольга Победовна билиһиннэрдэ.
Харысхан ПОПОВ