Ыраах сытар нэһилиэк
Биһиги улууспуту саамай ыраах сытар нэһилиэгэ Бороҕон буолар. Сайын, күһүн айан сырыыта суоҕа элбэх мэһэйдэри үөскэтэр. «Күһүҥҥү киһи күлбүтүнэн» диэн өс хоһооно бу нэһилиэк олохтоохторугар сөбө суох дуу диэҕи баҕарыллар. Билиҥҥи олох сайдыытын кэмигэр көтөр аал кэмигэр тиийбэтиттэн итинник санаа үөскүүр. Элбэх күүтүү-кэтэһии кэнниттэн ааспыт нэдиэлэҕэ «Якутопторг» сайаапкатынан анал рейсынан 1,5 туонна бородуукта тиийдэ (хортуоппуй, хаппыыста, луук, сүбүөкүлэ, дьаабылыка, халбаһыы, сымыыт уо.д.а). Тиксии олохтоохторо балаҕан ыйыгар сибиэһэй хортуоппуй, хаппыыста, онтон да атын ас арааһын атыылаһан үөрбүт-көппүт буоллахтарына, дьэ, бу ыраах сытар нэһилиэккэ, сэтинньи ыйга тиийэн, кээмэйинэн атыыланна. Тиксибэтэхтэр да бааллар. Нэһилиэк баһылыга Тамара Дмитриевна Томская этэринэн, сайаапка быһыытынан өссө биир анал рейсы күүтэллэр. Тиксибэтэх дьон испииһэгинэн онтон атыылаһыахтара диэн кэпсиир. Вертолет Тиксиигэ төннүүтүгэр аҕыс киһи көппүттэр. Онон пассажирскай рейсы күүтээччилэр син аҕыйаабыттар.
«Маны тэҥэ нэһилиэкпитигэр олох-дьаһах туруга кэминэн. Кыһыҥҥы айан суолунан Хара-Уулаахха диэри дьиэ-уот хаһаайыстыбатын суоппардара оттугу тиэйиини саҕалаатылар. Айылҕабыт барахсан сылаас тыынынан илбийэн тымныы кыһыны билэ иликпит. Култуура сынньалаҥ дьиэтин үлэһиттэрэ бу кэлэр ыйга ыччат декадатын ыытаары үлэлэрэ күөстүү оргуйар. Ыччат декадатын иһинэн ыытыллыахтаах спортивнай, КВН ону тэҥэ ырыаҕа-тойукка эдэрдэр күрэхтэрин олохтоохтор көрөн сэргиэхтэрэ турдаҕа”, – диэн кэпсиир Тамара Дмитриевна.
Бороҕон барахсан мин төрөөбүт-үөскээбит дойдум буолан, нэһилиэккэ туох сонун баарын күннэтэ истэбин-билэбин. Үөһээ этиллибит өс хоһооно төһө да кырдьыктааҕын иннигэр, нэһилиэк олохтоохторо күһүн кэлиитин үөрэ-көтө көрсөллөр. Булуҥ улууһугар ураты туспа айылҕалаах Бороҕоммут барахсан сир аһын арааһынан, сибиэһэй балыгынан, убаһа, ынах, таба этинэн күндүлүүр.
Евдокия БАИШЕВА
Хаартыска редакция архыыбыттан ылылынна