Үүнэр кэнэҕэски ыччаттарбытыгар «Култуура сылынан» бэлэхпит
Кэлэр 2014 сыл республикабытыгар Култуура сылынан биллэриллэн сыл устата араас хайысхалаах үлэлэр, тэрээһиннэр ыытыллыахтара диэн Саха Республикатын култууратын уонна духуобунаһын миниистэрэ Андрей Борисов иһитиннэриитин улуус кэрэ эйгэтигэр үлэлии сылдьар уонна үлэлээбит дьон истэн олус үөрдүбүт.
Булуҥ улууһа элбэх талааннаах, айар дьоҕурдаах дьоннооҕунан биллэр. Кинилэр айылҕаттан бэриллибит ураты талааннарынан саха норуотун культуурата дойду үрдүнэн үрдүк таһымҥа тахсыытыгар бэйэлэрин сэмэй кылааттарын киллэрсибиттэрэ. Бэйэлэрин идэлэригэр бэриниилээх, кыһыҥҥы тымныыга ыраах айаннары аахсыбакка, дьиэни-уоту умнан оройуон култууратыгар араас сылларга үлэлээбит дьоммутун ахтан ааһар сыалтан улуус олохтоохторугар, культуура үлэһиттэригэр этии киллэрэбит. Ол курдук, «Арктика Майааҕа» хаһыакка кэлэр сылга ахтыыларгытын, этиилэргитин, сурукка тиһиллибэтэх айымньыларгытын ыытаргытыгар. Бу буолуо этэ үүнэр кэнэҕэски ыччаттарбытыгар «Култуура сылынан» бэлэхпит. Хас биирдии киһи, тэрээһин история буоларын умнумуоҕуҥ.
Евдокия БАИШЕВА