Таймылыыр Алампата
Бу кыра уол бэһис кылаас үөрэнээччитэ. Аата Алампа. Олох кыра эрдэҕиттэн кинини эбэтэ Анна Николаевна иитэр. Алампа Ачикасов – ситиһиилээхтик үөрэнэр, спортсмен бэрдэ. Наһаа сэмэй, эйэҕэс, эбэтигэр улахан көмөлөөх киһи. Таймылыыртан ханна да ыраах айанныы илик. Сайынын дьонун кытта учаастакка сайылыыр эбит, быйыл сайын муораннан айаннаан иһэн, бэрт элбэх кэрэхсэбиллээҕи көрбүт: ниэрпэ устан иһэн муннун ууттан быктарбытын, чугас биэрэккэ төрөөбүт мохсоҕол оҕолорун көҥөнөн оҥочоҕо түһээри гынарын. Учаастакка көмөлөһөр үлэм элбэх, учаастакка сылдьарбын сөбүлүүбүн диир.
Алампа оскуолаҕа сөбүлүүр предметтэрэ – математика, уруһуй, физкультура. Таптыыр учууталынан Софья Егоровнаны (алын кылааска үөрэппит учуутала) ааттыыр. Улааттахпына спортсмен буолуохпун баҕарабын диир. Алампа уһуну ыстаныыга, тардыныыга олох үчүгэй көрдөрүүлэрдээх, волейболу, баскетболу, тенниһи сөбүлүүр, онон этэҥҥэ үчүгэйдик дьарыгырдаҕына кырдьык да оҕо сааһын баҕата туолуоҕа. Кини тулуурдааҕа көстөр, кыра сырыттаҕына ыарытыйбытын, эбээтэ кыһанан туран эмтээн, этэҥҥэ доруобуйата тупсубут.
Алампа диэн аатынан аҕата сүрэхтээбит, кини төрүөн иннинэ Алампа диэн ааты сүгэ сылдьыбыт таай убайдаах эбит. Ол убайыгар Алампа ааты Анна Николаевна бэйэтэ биэрбитэ үһү. Суруйааччы, биһиги Булуҥмутугар айымньылаах үлэтэ аһыллыбыт Алампа Соппуруонап кинигэлэрин сөбүлээн, таптаан аахпыт киһи. Мин бэйэм Таатта диэки элбэхтик сылдьыбытым да, биһиэхэ Алампа диэн ааттаах оҕо, улахан киһи баар диэни истэ иликпин. Онон ыраах Өлөөн өрүс үрдүгэр – Таймылыырга – саха бары дьонугар күндү аат күн ахсын ааттанара истиэххэ кэрэ.
Алампа уол этэҥҥэ эбэтин үөрдэ доруобай буоллун, баҕа санаата барыта туоллун.
Татьяна Слепцова,
общ.корр