Улуу Эбэ, хотун Өлүөнэ

От ыйын 2 күнүгэр биб­лиотека ааҕар киинигэр “Улуу Өлүөнэ Эбэ” диэн ааттаах сынньалаҥ тэрээһин буолан ааста. Тэрээһини иилээн-са­ҕалаан ыытта библиотекарь Вуталина Васильевна Стручкова. Кини Өлүөнэ өрүс туһунан, ханан устарын, хан­нык арыылар баалларын, бэрт элбэҕи сиһилии кэпсээтэ, били­һиннэрдэ. Өлүөнэ өрүс уонна кини дьикти сир­дэ­рин тустарынан хаартыскалары библиотека үлэһитэ Е.С. Матвеев таҥан оҥорбут көстүүлэрдээх слайдалары көрдөрдүлэр. Ма­ны таһынан “Өлүөнэ өрүс – Саха сирин чөмчүүгэ” кинигэ быыс­тапкатын ырытан билиһиннэрдэ Вуталина Васильевна.  Өлүөнэ өрүс уонна кини салааларын Амма, Бүлүү туһунан бу көрсүһүүгэ ырыанан К.И. Аммосов, З.П. Никулина, Е.О. Стручкова киэр­гэттилэр, байаныынан доҕуһуоллаата В.В. Томскай. “Саха” НКИК Булуҥнааҕы филиалын салайааччыта, мелодистка Күннэй Говорова (Н. Иванова) “Өлүөнэ” диэн бэйэтин авторскай ырыа­тын ыллаан дьон биһирэбилин, сэҥээриитин ылла. Түмүккэ Өлүө­нэ эбэ­ҕэ сыһыаннаах викторина ыытылынна уонна быы­һыгар көрдөөх ыйы­тыыларга көрөөччүлэр эппиэттээтилэр. Оонньуу түмүгүнэн кыа­йыылааҕынан ааттаннылар культура управ­лениетын үлэһиттэрэ О. Горохова, иккис миэстэ – П. Канина, үһүс – С. Захарова. Кыайыылаахтарга Багдарыын Сүлбэ, Сэмэн Тумат, Андрей Кривошапкин кинигэлэрин туттар­таатылар. Бары үөрэн-көтөн бардылар.

Инникитин маннык тэрээһиннэргэ элбэх киһи кэлэн кыттарыгар баҕарабыт.

Харысхан ПОПОВ

Ааптар хаартыскаҕа түһэриитэ