Улуус баһылыгын иһинэн Сэбиэт тэриллиэ
Федерация Сэбиэтэ “Российскай Федерация аҕыйах ахсааннаах норуоттарын бырааптарын мэктиэтин туһунан” 7 ыстатыйатыгар уларытыылары киллэрэр туһунан” федеральнай сокуону биһирээтэ.
Дакылааты Федерация Сэбиэтин хоту дойду дьыалаларыгар, олохтоох салайыныыга, регионнааҕы политикаҕа, федеративнай тутулга Кэмитиэтин бэрэссэдээтэлин солбуйааччы Александр Акимов оҥордо.
Биһиги сенатор Акимовка телефонунан быһа сибээскэ тахса сырыттыбыт:
– Сылтан ордук үлэлэһэн муниципальнай тэриллиилэр баһылыктарын истэринэн аҕыйах ахсааннаах норуоттар интэриэстэрин көмүскүүр Сэбиэттэри тэрийэр туһунан сокуону Госдума ылынна. Сокуон таҕыста, билигин нуорма-быраап докумуоннарын оройуоннар бэйэлэрин истэригэр ылыныахтара, Сэбиэттэрин тэриниэхтэрэ. Сэбиэт общественнай төрүккэ олоҕурар. Сүрүн боломуочуйатынан аҕыйах ахсааннаах норуоттар өйдөммөт, мөккүөрдээх боппуруостарын быһаарыахтара. Салгыы бу сокуоҥҥа сөп түбэһиннэрэн, территорияны аттарыыга үлэлиибит. Холобур, таба мэччийэн сылдьар сирэ куруук олус мөккүөрдээх боппуруос. Эбэтэр таба аһылыга лабыкта – ойуур кодексынан Россия фондатынан буолар. Общиналар сирдэрэ бэйэлэригэр сыһыарыллыахтаах. Дьэ, бу маннык курдук уонна эбии бултааһыҥҥа, балыктааһыҥҥа уларытыылары киллэриэхтээхпит.
Онон, Булуҥ улууһугар сотору кэминэн олохтоох норуоттар бөҕө тирэхтээх буолууларын туруулаһар Сэбиэт тэриллиэ. Сэбиэккэ, биллэн туран, саамай сөптөөх кандидатуралар талыллыахтара. Кинилэргэ норуот аатыттан күүстээх эппиэтинэс сүктэриллиэ.
Полина Николаева